Qëndrimi në Phenianin e Kim Jong Un zgjati shumë pak, gati 24 orë, mbërriti të martën në mbrëmje e u largua të nesërmen. Por Vladimir Putin u prit në Korenë e Veriut si hero, si lider i plotfuqishëm, si një VIP, si personaliteti më i famshëm a personazh historik.
Nga vizita, të gjithë e kuptuam, se Kim Jong Un ishte angazhuar prej kohësh, me një ekip të ngushtë, të organizonte gjithçka në përpikmëri e perfeksion, për një qëndrim sa më të këndshëm të homologut rus në kryeqytetin që vetë e kontrollon. Dhe agjenda, ishte veç diskutimeve, për luftën e armët nukleare, edhe për pak qejf e argëtim, me Putinin që prej thuajse 2 vitesh e gjysmë, drejton një operacion special ushtarak në Ukrainë.
Tapeti i kuq për Putinin ishte shtruar që në aeroportin e Phenianit. Ai u prit me nderime që atje, me Kim Jong Un që veç dorës, i dhuroi homologut e aleatit të tij, mes të vetmeve miq, edhe një përqafim, në shenjë mirëseardhjeje. Pas pak minutave bisedë, të dy iu drejtuan limuzinës luksoze, me eskortën me mbi 30 motorë e makina të blinduara, që e ndiqnin nga pas.
Kryeqyteti i Koresë së Veriut ishte thuajse pa jetë, teksa gjithçka ishte vënë në dispozicion të presidentit rus për 24 orë. Anekënd qyteti ishte veshur me ngjyrat e flamujt e Rusisë si dhe me portretet e tij të vendosura kudo, me postera gjigandë.
Takimi kokë më kokë zgjati, si për të treguar se dy aleatët, kishin për çfarë diskutonin. Lufta, furnizimi I Rusisë me armatime, Rusia dhe nderet e saj për Korenë, sidomos nëse flasim për teknologjinë. Armët nukleare. Kërcënimi i vazhdueshëm nga fqinji jugor dhe mundësia e një lufte që prej më shumë se 7 dekadash qëndron aty, e ndezur, gati për të shpërthyer.
Putin duket se veç marrëveshjeve dhe mbështetjes së pa limituar të Phenianit zyrtar, edhe u kënaq në këtë vizitë 1 ditore. Televizioni shtetëror i Koresë së Veriut, KRT, publikoi video me përmbledhjen e qëndrimit të Putinit në Veri, në të parën vizitë të tij pas 24 vitesh në shtetin komunist.
Video është e gjatë 75 minuta, e trajtuar dhe montuar me shumë kujdes, pa asnjë gabim, që nis me ceremoninë e mikpritjes në aeroport e vijon më pas me samite e takime kokë më kokë edhe me dyer të mbyllura. Vizita vazhdon më pas me mbrëmjen gala organizuar posaçërisht për Vladimir Putinin e shumë aktivitete të tjera argëtuese, e Kim që me krenari i tregoi homologut rus pasurinë e vendit të tij por njëjtë si Putini, edhe adhurimin e tij për kafshët, për kalërimin, fermën, sportin, makinat e shtrenjta e luksoze, të blinduara deri në dhëmbë.
Limuzina që Putini e drejtoi vetë mes buzëqeshjes e batutave me Kim, ishte një prodhim rus, nga kompania Aurus dhe për këtë Putin s’mund të ishte më krenar se kaq. Gjatë vizitës, Kim dhe Putin firmosën edhe paktin për thellim të partneritetit strategjik mes tyre si dhe u dakordësuan për të siguruar asistencë të menjëhershme ushtarake, nëqoftëse njëra palë ose tjetra përballej me një agresion të armatosur ushtarak.
Kësisoj, në këtë moment, më i rrezikuar ndihet Putini dhe Kim Jong Un do ti vijë në ndihmë. Por mes shumë dhuratash e zotimesh që Putin mori nga homologu koreano-verior, spikasin 2 qentë pungsan, të bardhë siç Putini i pëlqen, vendosur në një gardh me trëndafila shumë ngjyrësh. Sipas medias KRT, Kim jong Un preferon që dhuratat ti bëjë të bukura e të mbështjella bukur. Dhe Putini u surprizua vërtet. Qentë Punsgan janë një rracë qensh gjuetie, që rriten vetëm në rajonin verior të Koresë së veriut.
Në fakt, është hera e dytë që Kim Jong Un dhuron një çift qensh Punsgan. Më herët në 2018, ja dhuroi një çift të ngjashëm edhe ish-presidentit të Koresë së Jugut, Moon Jae, të quajtur “Gomi” and “Songgang” kur u takua me të për herë të parë dhe të fundit në 2018, kur marrëdhëniet mes dy vendeve panë pak çaste mirëkuptimi.
Mes një dite të gjatë e të ngjeshur, të mirë organizuar në detaje edhe në minuta, e madje sekonda. Mes koncertesh festive, drekash luksoze, duartrokitjesh, vizitash në lapidarë për të rënët në luftë apo pranë varrit të babait të Kim, Kim Jong Il, në orët e mbrëmjes, siç erdhi, Putini edhe u largua. Kim Jong Un u kujdes që ta përqafojë edhe në largim, me urimin e një takimi të radhës shumë shpejt. Veç ushtrisë, në aeroport për të përcjellë Putinin, ishin edhe qindra qytetarë, që pa zhurmë përshëndetën mikun e aleatin rus. Shihemi së shpejti, ishte zotimi i të dyve.
