Ditën e nesërme në orën 17:00 pritet të mbahet seanca e radhës plenare në Kuvendin e Shqipërisë. Ndërkaq, 23 deputetë të opozitës, janë të përjashtuar me 10 ditë nga punimet e Kuvendit për shkak të bllokimit të seancës së fundit parlamentare.
Vendimi i sekretariatit të Kuvendit për procedurat, votimet, dhe etikën ka hyrë në fuqi me datë 19 Tetor dhe është publikuar krahas rendit të ditës për seancën e së Hënës.
Një reagim për këtë situatë ka patur edhe nga vetë opozita. Në një mesazh dërguar deputetëve, kreu i grupit parlamentar të PD-së, Gazmend Bardhi bën me dije se pavarësisht vendimit të përjashtimit, deputetët do të jenë të gjithë në seancë.
“Nesër e hënë, ora 17:00, është planifikuar seanca e rradhës plenare. Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë!”-thotë Gazmend Bardhi.
Kujtojmë se mes deputetëve të përjashtuar janë edhe Sali Berisha, Gazmend Bardhi, Flamur Noka, Ina Zhupa, Bujar Leskaj. Edmond Spaho, Sajmir Korreshi, Luan Baçi, Tritan Shehu dhe Helidon Bushati.
