Kryetari i Bashkimit Demokratik për Integrim, Ali Ahmeti ka bërë thirrje për bashkim, me rastin e 22-vjetorit të Marrëveshjes së Ohrit mes shqiptarëve dhe maqedonasve për të krijuar raporte të reja shoqërore-politike për ta ndërtuar shtetin që sot quhet Maqedonia e Veriut.
Ahmeti përmes një video-mesazhi tha se bashkimi “rreth frontit europian” është nevojë dhe përgjegjësi historike.
“Në këtë përvjetor të Marrëveshjes së Ohrit bëj thirrje për bashkim, unifikim rreth frontit europian si nevojë dhe përgjegjësi historike e kohës dhe hap i domosdoshëm për ta siguruar të ardhmen. Vetëm të bashkuar jemi më të fortë”, tha Ahmeti.
Ai tha se pas luftës dhe miratimit të ndryshimeve kushtetuese në vitin 2001, tani po tejkalohen “barrierat e fundit të barazisë së shumëkërkuar”.
Ndër të tjera, Ahmeti theksoi se gjuha shqipe dhe flamuri kombëtar tani janë zyrtare dhe se shqiptarët janë pjesë e të gjitha dikastereve qeveritare.
“Po ndërtojmë edhe autostrada me Shqipërinë dhe Kosovën, me rajonin, të cilat edhe po i unifikojnë kufijtë”, tha Ahmeti.
Maqedonia e Veriut është para një procesi ku do t’i duhet të lëvizë në përpjekje për t’i shpëtuar bllokimit të procesit të integrimit të vendit në BE. Parakusht në këtë rrugë është çështja e ndryshimit të Kushtetutës dhe përfshirjen e bullgarëve në preambulë.
Duke qenë kështu, Ahmeti bëri thirrje për bashkimin e shqiptarëve pasi tha se “vendimet e mëdha kërkojnë guxim, e jo kalkulim; kërkojnë vizion, e jo shkurtpamësi; kërkojnë prirje, e jo struktim”.
