Ministri i Drejtësisë, Ulsi Manja, ka mbajtur fjalën e tij në panelin e parë në Kongresin e Partisë Socialiste, ku në fokus është Reforma në Drejtësi.
Manja në fjalën e tij para delegatëve socialiste tha se vendimi i Strasburgut për 21 janarin i ka hapur rrugë drejtësisë. Sipas tij ky vendim dëshmon se drejtësia nuk e le asnjëherë në harresë të drejtën.
“Drejtësia për 21 janarin është provë themeli për të mbrojtur vlerat e demokracisë. Për ne socialistët shqiptarë 21 janari është plagë dhimbje por në këtë kongres ndihemi paksa të lehtësuar pasi vendimi i Strasburgut i ka hapur rrugë drejtësisë. Vendimi i Strasburgut dëshmon më shumë se kurrë se drejtësia asnjëherë nuk e lë në harresë të drejtën. Paneli i këtij kongresi nis me drejtësinë, pasi tek drejtësia e ka zanafillën te modernizmi i shtetit. Me ardhjen në pushtet të PS, u premtuan shqiptarëve drejtësi të pavarur, aspiratë e zhvilluar që kur ishim në opozitë. Votën plebishitare të 2013 e farkëtuam përmes një përpjekje historike për ti dhënë Shqipërisë drejtësinë që nuk e ka pasur që prej themelit të shtetit shqiptar. Këtë proces transformimi do ta shtyjmë para, pavarësisht çdo lloj çmimi”, tha Manja.
Sipas ministrit Manja, reforma në drejtësi e ka përmbushur misionin dhe institucionet e drejtësisë janë në fazën e konsolidimit duke prodhuar rezultate.
“Në këtë fazë që jemi sot reforma e ka mbushur misionin dhe institucionet e drejtësisë janë në fazën e konsolidimit duke prodhuar rezultate të prekshme për çdo qytetar shqiptar. Sot u takon drejtësisë që të kujdesen që çdo qytetar të marrë drejtësi me standarde, me prova e fakte dhe garanton respektin e të drejtave dhe lirinë themeltare të çdo qytetari. Sot në sajë të reformës Shqipëria është bërë një partner i besuar në luftën kundër krimit, duke dëshmuar se epoka e pandëshkueshmërisë i përket një epoke tjetër. PS do ta mbështesë modernizmin e sistemit të drejtësisë. Kemi dyfishimin e buxhetit të drejtësisë në 7 vite”, vijoi Manja.
