Një studente universiteti në Rusi, Olesya Krivtsova është detyruar të lërë shkollën pasi është vënë nën akuzë nga policia. Arrestimi i 20-vjeçares ka ardhur për shkak se ka postuar mesazhe kundër luftës Ukrainë-Rusi në rrjetet sociale.
Policia e ka dënuar me arrest shtëpie duke i vendosur shiritin elektronik në këmbë për të monitoruar çdo lëvizje të Krivtsovës.
Olesya ka postuar disa mesazhe ku një prej tyre ka patur të bejë me shpërthimin në urën që lidh Rusinë me Krimenë tetorin e kaluar.
“Unë postova një histori në Instagram për urën, duke reflektuar se si ukrainasit ishin të kënaqur me atë që kishte ndodhur”, thotë Olesya për BBC.
Ajo kishte shpërndarë edhe postimin e një miku të saj për luftën.
“Unë po flisja në telefon me nënën time,” kujton Olesya, “kur dëgjova hapjen e derës së përparme. Shumë policë hynë brenda. Më morën telefonin dhe më bërtitën të shtrihesha në dysheme.”
Olesya u akuzua për justifikimin e terrorizmit dhe diskreditimin e forcave të armatosura ruse. Ajo rrezikon deri në 10 vjet burg.
“Nuk e kisha imagjinuar kurrë që dikush mund të merrte një dënim kaq të gjatë me burgim për postimin e diçkaje në internet,” thotë Olesya. “Kisha parë raporte për vendime të çmendura në Rusi, por nuk i kisha kushtuar shumë vëmendje dhe vazhdova të flisja”.
Olesya tani është shtuar në listën zyrtare të terroristëve dhe ekstremistëve në Rusi.
Sipas rregullave të arrestit shtëpiak, asaj i ndalohet të flasë në telefon dhe të hyjë në internet.
Olesya ka një tatuazh në këmbën e saj të djathtë ku shfaqet Presidenti rus Vladimir Putin si një merimangë, me mbishkrimin “Big Brother po ju shikon”.
Duket se në rastin e Olesyas, nuk ishte Big Brother që e shikonte atë, por shokët e saj studentë.
“Një mik tregoi një postim për mua në një bisedë,” thotë Olesya, “për mënyrën se si isha kundër “operacionit special ushtarak”. Shumica e njerëzve në këtë bisedë ishin studentë të historisë. Ata po diskutonin nëse do të më denonconin tek autoritetet”.
Në një koment, Olesya akuzohet se ka shkruar “postime provokuese të një karakteri disfatist dhe ekstremist dhe se kjo nuk është gjëja e duhur për kohë lufte”.
Bisedat:
“Së pari le të përpiqemi ta diskreditojmë. Nëse ajo nuk e kupton, le të merren shërbimet e sigurisë.”
“Denoncimi është detyrë e një patrioti”, shkruan dikush tjetër.
Më vonë, kur lista e dëshmitarëve të prokurorisë u lexua në gjykatë, Olesya njohu emrat nga biseda e studentëve.
Që atëherë, në të gjithë Rusinë ka pasur raporte për denoncime të stilit sovjetik kundër kritikëve të luftës. Ato përfshijnë studentë që informojnë mësuesit dhe punëtorët që denoncojnë kolegët.
Gjykatësi vendosi ta mbajë Olesyan në arrest shtëpie.
“Shteti nuk të jep të drejtën për debat, për demokraci apo liri,” thotë Olesya. “Por ata nuk mund t’i fusin të gjithë në burg. Në një moment ata do të mbeten pa qeli.”
