Kanë ngritur tendat duke formuar mini-kampin e tyre, që prej prishjes së atij të refugjatëve në Calais nga autoritetet franceze. Bëhet fjalë për një grup prej 150 emigrantësh shqiptarë që flenë në natyrë pranë brigjeve franceze.
Televizioni britanik “Channel 4” realizoi një reportazh në kampin e ngritur, ku shqiptarët, pjesa më e madhe meshkuj, kalonin natën në pritje të udhëtimit të tyre përmes kanalit të La Manshit, drejt Britanisë së Madhe. Disa prej tyre thonë se e kanë provuar një herë fatin në Britani, por janë depërtuar nga autoritetet.
Shqiptarët shprehen se u është rrezikuar edhe jeta, pasi tendat janë ngritur poshtë një shkëmbi, dhe shpeshherë bien gurë nga lart. Landi një 20-vjeçar i tha gazetarit britanik se nuk kërkon ndonjë jetë luksi.
“Nuk kërkoj asgjë të veçantë. Dua një jetë normale. Të shkoj në punë përditë e të kthehem në shtëpi. Të flas me prindërit në internet. Asgjë të veçantë, vetëm kaq”, ka thënë ai.
Televizioni britanik zbuloi se shqiptarëve u janë kërkuar të paktën 7 mijë stërlina nga trafikantët e emigrantëve, për të kaluar në Britaninë e Madhe.
Po sot mediat britanike publikuan videon ku shihen 2 trafikantët britanikë, të cilët transportojnë gomonen me të cilën të dielën udhëtuan 18 shqiptarët që rrezikuan të mbyteshin.
Kanali i La Manshit është një nga shtigjet më të rrahura nga trafikantët e emigrantëve. Autoritetet britanike ngritën alarmin se nëse nuk shtohen forcat detare, ai rrezikon të bëhet si Mesdheu, ku qindra emigrantë po mbyten përditë. /TV KLAN
