Numri i vdekjeve të konfirmuara nga përmbytjet në Greqinë qendrore u rrit në 15 pasi trupat e katër personave të konsideruar më parë të zhdukur u gjetën të dielën, thanë autoritetet.
Tre prej trupave u gjetën në fshatra pranë qytetit të Karditës në Thesalinë perëndimore. Bëhet fjalë për një grua 88-vjeçare dhe djalin e saj 65-vjeçar, të cilët u gjetën në shtëpinë e tyre, si dhe një 58-vjeçar, trupi i të cilit u gjet mes dy fshatrave.
Roja bregdetare tha të dielën po ashtu se ishte zbuluar edhe trupi i një 42-vjeçari, i zhdukur që nga e marta. Ai u pa për herë të fundit në makinën e tij në pamundësi për ta kontrolluar atë në ujërat e furishëm.
Shërbimi zjarrfikës i Greqisë tha se që nga përmbytjet që goditën Greqinë qendrore të martën, janë evakuuar rreth 3,500 njerëz. Operacionet e shpëtimit vazhdojnë.
Niveli i ujit duket se është ulur, megjithëse lumi Pineios, rruga kryesore ujore në Thesali, po ngrihet në grykën e tij, tha të dielën në mbrëmje zëdhënësi i Shërbimit Zjarrfikës, Yiannis Artopios.
