Seanca gjyqësore për caktimin e masës së adoleshentit, i cili dyshohet se vrau me thikë bashkëmoshatarin e tij, Martin Canin, do të mbahet nesër në orën 9:30.
Sipas burimeve, M.P. ndodhet në një spital privat pas plagëve që mori gjatë sherrit, ku mbeti i vdekur bashkëmoshatari i tij, dhe pritet që masa t’i komunikohet aty.
“Ju njoftoj se seanca gjyqësore për vleftësimin dhe caktimin e masës së sigurimit ndaj të miturit në konflikt me ligjin M.P. do të zhvillohet ditën e nesërme datë 22.11.2024, ora 09:30”, sipas njoftimit.
Kujtojmë se ngjarja e rëndë ndodhi ditën e hënë gjatë një përleshjeje fizike mes disa adoleshentëve, 200 metra larg shkollës 9-vjeçare “Fan Noli”.
Autori dhe viktima ishin konfliktuar të premten dhe e vijuan zënkën edhe ditën e hënë.
Gjatë përplasjes mbeti i plagosur edhe shoku i viktimës, ndërsa autori mori një plagë aksidentale në parakrah.
