Tetë kandidatë për kryetar bashkie e kanë braktisur deri më tani Enkelejd Alibeajn, ndërsa për garën e 14 majit i kanë mbetur edhe 14 emra.
Në një intervistë për “News24”, Alibeaj thotë se i mirëkupton ata që janë tërhequr, pasi janë në presion.
Sipas tij, kandidatët janë tërhequr pasi janë ndier në presion nga sulmet e demokratëve të tjerë, të cilët sipas tij, nuk shikojnë si kundërshtarët PS, por demokratët që mendojnë ndryshe.
“Kjo kohë është kohë sakrificash. Unë nuk pretendoj që siç unë e mendoj ta mendojnë dhe të tjerët. Unë bëj përpjekjen time dhe kam vendosmërinë maksimale ta çoj deri në fund. I falënderoj të gjithë ata që në një kohë të vështirë morën përsipër kandidimin, por disa prej tyre bënë zgjedhje. Duhet t’i shihni dhe shpjegimet që kanë dhënë. E kanë të mirën, e kanë moralin brenda. Ata janë udhëhequr nga më e mira ndaj qytetarëve. E keqja më e madhe është regjimi që i janë bashkëngjitur dhe shushunjat e vjetra politike. Jemi në një demokraci, në vend të lirë, ku njerëzit janë të lirë të zgjedhin. Askush nuk ka qenë i detyruar të marrë përsipër këtë sfidë. Kanë respektin tim maksimal për çfarë kanë bërë. Kanë presion. Presioni është të shohësh të ngjashmit e tu, ata me të cilët ke bërë beteja, sot në mënyrë të paimagjinueshme tytat e bataresë nuk i kanë drejtuar ndaj kundërshtarit të madh të shqiptarëve, por ndaj nesh”, deklaroi Alibeaj.
