Lulzim Basha ka mbledhur sot strukturat e Partisë Demokratike, me qëllim mobilizimin për protestën e 13 prillit. Basha në mbledhjen e kryesisë u ka kërkuar demokratëve që në çdo takim t’u shpjegojnë njerëzve se PD është shumicë absolute. Ai ka shtuar se situata është në favor të opozitës, duke kërkuar pjesëmarrje masive në protestën e së shtunës.
“Për protestën e 13 prillit duhet një organizim kapilar për të pasur pjesëmarrje edhe më të madhe se dy protestat e tjera kombëtare. Kemi të gjithë situatën në favor. Ne jemi de fakto shumicë. Që pas djegies së mandateve, PD ka një rritje të menjëhershme edhe mes të pavendosurve. Jemi shumicë absolute në çdo sondazh të pavarur vendas dhe të huaj. Duhet ta përkthejmë sa me shpejt në votë ketë mbështetje të shqiptareve. Për këtë arsye, pjesëmarrja e larte ne proteste ka një rëndësi të jashtëzakonshme”, ka thënë Basha.
Protesta e 13 prillit do të jetë protesta e tretë më e madhe e opozitës, pas dy protestave të 16 shkurtit dhe 16 marsit.
Ndërkohë, sot në Tiranë do të vijë Zëvendës Ndihmës Sekretari Amerikan i Shtetit Matthew Palmer në kuadër të një turi ballkanik. Palmer do të takohet sot me kryeministrin Edi Rama, ndërsa ditën e nesërme me Lulzim Bashën dhe Presidentin Ilir Meta./Opinion.al
