Kryetari i Partisë së Lirisë, Ilir Meta ditën e sotme në Mbledhjen e Komitetit Organizator të partisë, akuzoi qeverinë se fatura e korrupsionit të saj shkon në 12 miliardë euro. Këtë Meta e cilësoi një tërmet shkatërrimtar për financat publike dhe financat e shqiptarëve që i paguajnë sot e në të ardhmen.
Meta u shpreh se qeveria ka shpërdoruar 2 miliardë euro korrupsion me energjinë, ku sipas tij depitori më i madh me OSHEE është shteti. Kreu i PL-së tha se, lekët janë përdorur nga institucionet e qeverisë për investime të panevojshme dhe se duan që detyrimet t’i paguajnë qytetarët e thjeshtë.
“Janë 2 miliardë euro korrupsion me energjinë, debitori më i madh me OSHEE është shteti, institucionet e qeverisë se lekët i përdorin për ahengje, për korrupsion, investime të panevojshme. E pastaj duan që këto detyrime ti paguajnë qytetarët e thjeshtë duke ua shumëfishuar. A ka korrupsion më gjigand se sa me rilindjen urbane? 2 miliardë euro. Mirë që është hedhur gjithë ai beton në sheshin e Kolonjës por sikur të ishin mbështetur më shumë fermerët që merren me blegtori. Një pjesë e mirë ka qenë investime fiktive, investime për të vjedhur klientët e qeverisë, pa asnjë leverdi ekonomike për komunitetin e vendit. Afera e Portit të Durrësit një nga më kriminalet, kërkon ta çojë në duar të dyshimta një aset të vendit, sikurse janë të gjitha të dhënat paraprake. Tenderat sekretë me 99.9% të cmimit, shumëfishimi i kostove të rrugës, koncensionet e PPP që kalojnë dhe ato mbi 2 miliardë euro, po ti mbledhësh janë 12 miliardë euro fatura e korrupsionit të Rilindjes, tragjedi e vërtetë për të sotmen e të ardhmen. Tërmet shkatërrimtar për financat publike dhe financat e shqiptarëve që i paguajnë sot e në të ardhmen. Këta hajdutë me në krye hajdutin Rama paraqesin një paketë në kohën e krizës më të rëndë të çmimeve, përfshirë dhe shkakun e korrupsionit të tyre”, u shpreh Meta./Opinion.al
