Prokuroria e Tiranës ka caktuar masën e “arrest me burg” për 26-vjeçarin, Rei Nozlli. Dy ditë më parë Nezolli goditi me grushte dhe shkelma sekretarin e KZAZ-së së Kasharit, Remzi Memedi.
“Me kërkesë të Prokurorisë pranë Gjykatës të Shkallës së Parë të Juridiksionit të Përgjithshëm Tiranë, shtetasi R.N. u la në masën e sigurisë ‘Arrest në burg’ për veprën penale ‘Kanosje apo dhunimi ndaj pjesëmarrësve në zgjedhje’ parashikuar nga neni 329/3 i Kodit Penal”, njoftoi Prokuroria.
26-vjeçari Nozolli ishte vëzhgues i kandidatit të Partisë Socialiste Orlando Rakipit.
“Në datën 15.05.2025, në KZAZ nr.30, Kashar, ka qenë duke u zhvilluar procesi i numërimit të votave për kandidatët për deputetë që kanë garuar në zgjedhjet e përgjithshme të datës 11.05.2025. Rreth orës 14.00’, gjatë procesit të numërimit, numëruesi përkatës ka deklaruar të pavlefshme një votë dhe atë moment shtetasi R.N. dhe disa persona të tjerë që ndodheshin me të, kanë reaguar duke bërtitur, duke shprehur mosdakortësinë me këtë vendim të numëruesit”, sqarohet në njoftimin e Prokurorisë.
