Ekipet e kërkim-shpëtimit po vijojnë operacionin për të gjetur ndonjë të mbijetuar nën rrënojat e pallatit 12-katësh që u shemb para disa ditësh në Miami të SHBA-ve, edhe pse mundësitë që të ketë ende të gjallë zvogëlohen.
Bilanci i viktimave ka arritur në 11, ndërsa më shumë se 150 njerëz janë ende të zhdukur dhe zyrtarët thonë se nuk pranojnë të dorëzohen. Kërkimi për të mbijetuar vijon edhe pse temperaturat e larta kanë prekur të gjithë vendin.
Ekipet e emergjencave amerikane tani janë bashkuar me ekipe nga Izraeli dhe Meksika për të ndihmuar në operacionin. Po ashtu po përdoren edhe makineri të mëdha për të hequr rrënojat.
Për të gjetur të mbijetuar forcat e kërkim-shpëtimit po përdorin qen të trajnuar, gjithashtu edhe 30 zjarrfikës ndodhen në vendngjarje.
Ndërtesa e Champlain Towers South përmbante 136 apartamente dhe 55 prej tyre u shembën të enjten duke lënë pas një grumbull të madh rrënojash.
Mediat ndërkombëtare raportojnë se hetuesit janë tashmë në vendngjarje dhe po punojnë për të gjetur shkakun e shembjes dhe për të siguruar ruajtjen e provave, ndërkohë që më herët kanë dalë dhe raporte mbi problemet në strukturën e kësaj ndërtese.
Sipas ligjit të Florida-s, ndërtesat duhet të inspektohen çdo 40 vjet dhe ndërsa kompleksi ka qëndruar që nga viti 1980 pa iu bërë ndonjë kontroll.
Një raport i realizuar në 2018 nxori në përfundim se në këtë ndërtesë ishte bërë një gabim i madh sa i përket modelit origjinal të saj.
Ndërtesa ishte duke u zhytur me një shpejtësi prej dy milimetra në vit që nga vitet 1990, duke e dëmtuar rëndë strukturën e tij.
