Prokuroria e Posaçme e Anti-Korrupsionit ka dërguar për gjykim dosjen me 6 të pandehur të cilët tentuan të trafikonin mbi 1 ton kanabis drejt Greqisë në shkurt të vitit të shkuar.
Njoftimin për mbylljen e hetimeve e ka bërë vetë SPAK. Të pandehurit në këtë dosje janë Bashkim Murataj, Gentian Ramadani, Adrian Sako, Zija Hidri, Andrea (Renato) Muço e Mariglen Sako.
Katër prej tyre akuzohen për veprën penale të “Trafikimit të narkotikëve” mbetur në tentativë, kryer në bashkëpunim, në kuadër të grupit të struktuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 283/a/1 e 22, 28/4, 333/a/2 dhe 334/1 të K.Penal.
Kreu i grupit është cilësuar Bashkim Murataj i cili nuk është kapur ende nga forcat e policisë ndërsa Gentian Ramadani, Adrian Sako dhe Zija Hidri ndodhen në arrest me burg.
Andrea (Renato) Muço dhe Mariglen Sako akuzohen për veprën penale të “Moskallzimi i krimit” kryer në bashkëpunim, parashikuar nga neni 300/1 e 25 të Kodit Penal.
“Për të pandehurit si më sipër, është kërkuar dërgimi i çështjes për gjykim, pasi më 12.02.2019 duke u gdhirë data 13.02.2019, të pandehurit Adrian Sako dhe Zija Hidri, në bashkëpunim me të pandehurit Bashkim Murataj dhe Gentjan Ramadani, nën drejtimin dhe organizimin e grupit të strukturuar kriminal nga ana e të pandehurit Bashkim Murataj, kanë tentuar të trafikojnë 104 (njëqind e katër) thasë të mbushur me lëndë narkotike të llojit cannabis sattiva, në peshën e përgjithshme 1074.2 kg, nepermjet Pikes se Kalimit Kufitar Kapshtice. Ndërkohë të pandehurit Andrea Muço dhe Mariglen Sako, megjithëse në dijeni të faktit kriminal të mësipërm, nuk kanë kallzuar në lidhje me faktin në organet e ndjekjes penale.”- thuhet në njoftimin e Prokurorisë. /Opinion.al
