Më shumë se 100 njerëz kanë vdekur nga përmbytjet dhe rrëshqitjet e dheut të shkaktuara nga mbetjet e tajfunit Yagi në Mianmar.
Mësohet se 113 persona janë konfirmuar të vdekur dhe 64 të tjerë të zhdukur, megjithëse raportet rajonale dyshojnë se numri i vdekjeve mund të jetë më i lartë.
Ndërkohë, mbi 320,000 njerëz janë detyruar të evakuohen në strehimore të përkohshme.
Yagi, stuhia më e fuqishme e Azisë këtë vit, tashmë është dëshmuar shkatërruese pasi përfshiu Vietnamin, Laosin, ishullin kinez të Hainan dhe Filipinet.
Të paktën 287 persona mendohet se kanë vdekur si pasojë e stuhisë para se të arrinte në Mianmar.
Në Myanmar, media shtetërore raporton se gati 66,000 shtëpi ishin shkatërruar që nga mbrëmja e së premtes, së bashku me 375 shkolla dhe një manastir. Gjithashtu që nga e premtja, më shumë se 236,000 njerëz po strehoheshin në 187 kampe ndihmash.
Ndikimet e reshjeve të mëdha janë përqendruar në shtetet Kayah, Kayin, Mandalay, Mon dhe Shan, të cilat mbulojnë rajonin qendror të Mianmarit.
Ministria e informacionit e Mianmarit thotë se punonjësit e urgjencës dhe shëndetësisë janë vendosur në zonat e prekura nga përmbytjet dhe se ka siguruar fonde për ushqim dhe ujë të pijshëm për të evakuuarit.
Gjithashtu ka filluar riparimi i rrugëve dhe urave të dëmtuara, raportojnë mediat shtetërore.
Shkencëtarët thonë se tajfunet dhe uraganet po bëhen më të fortë dhe më të shpeshtë me ndryshimet klimatike./Opinion.al
