Dhjetë televizione janë bërë bashkë kundrë ligjit të hartuar dhe miratuar nga PD-PS në Parlament që i detyron të transmetojnë reklama falas gjatë fushatës. Ata i kanë dërguar një letër Komisionit Qendror të Zgjedhjeve, Autoritetit të Mediave Audiovizive dhe OSBE-së ku kërkojnë nga partitë politike që të marrin masa. Pronarët e TV kërkojnë që të zbatohet Kodi Zgjedhor dhe jo ligji për partitë politike.
“Ne, përfaqësuesit e mediave kryesore, unanimisht vendosëm tu njoftojmë se ligji i zbatueshëm për transmetimin e reklamave të partive politike në fushatën elektorale për zgjedhjet e përgjithshme, 25 qershor 2017, është Kodi Zgjedhor i Republikës së Shqipërisë, i cili prevalon mbi ligjin për partitë politike. Lutemi, njoftoni subjektet elektorale të regjistruara në zgjedhje, që të marrin masa për zbatimin e Kodit Zgjedhor të Republikës së Shqipërisë, nenit 84, të miratuar me konsensus prej tyre”, shkruhet në letër.
Letra në fjalë është firmosur nga pronarët e Tv Klan, Top Channel, Vizion Plus, News 24, Ora News, Abc News, Channel 1, Top News, Kanali 7, Report Tv.
