Një 41-vjeçar është dënuar me 10 muaj burg në shtetin grek nga Gjykata Autonome e Kundërvajtjeve Njëanëtarëshe e Selanikut.
Bëhet fjalë për shqiptarin, i cili të dielën në mbrëmje përplasi me makinë motoçikletën e ish-gruas së tij dhe më pas e kërcënoi se do ta vriste.
Denoncimi për kërcënimin është bërë dy ditë pas ngjarjes, ku sipas deklaratës së viktimës, ajo shprehet se ndjeu një frikë të fortë se të dielën do të vdiste në duart e ish-bashkëshortit të saj.
“Ai u ka thënë edhe fëmijëve tanë se do të më vrasë dhe mos u shqetësoni sepse i ka rregulluar të gjitha”, ka thënë ndër të tjera 35-vjeçarja.
Në deklaratën e tij, 41-vjeçari mohoi akuzën dhe tha se nuk kishte asnjë lidhje me kërcënimin. Ai pohoi se është një baba i mirë dhe se kurrë nuk u ka thënë fëmijëve të tij se donte t’u vriste nënën.
