Kryeministri në detyrë i Kosovës, Albin Kurti është kërcënuar me jetë, përmes rrjetit social Facebook.
Një person me llogarinë, Daniel Arianitti, ka shkruar se jep një shpërblim prej 10 milionë eurosh në këmbim “të kokës së Albinit”, të cilin e ka krahasuar me ish-liderin e Kubës, Fidel Castro.
“10 milionë euro kush ma sjell kokën e Albinit, Fidel Castros, psikopatit shqiptar”, ka shkruar ai në Facebook.
Menjëherë pas këtij kërcënimi ka reaguar Lëvizja Vetëvendosje e cila ka bërë një kallëzim penal në policinë e Kosovës.
Zëdhënësi i Vetëvendosjes, Arlind Manxhuka, bën me dije se tashmë me këtë çështje po merret prokuroria dhe iu kërkon mbështetësve të mos merren personalisht me kërcënuesin e Kurtit.
“E di që shumë prej jush e keni marrë me shumë seriozitet një kërcënim të një personi që kishte bërë ndaj Albinit në FB, por nuk është zgjidhje që privatisht e personalisht të merreni me të, madje s’do të duhej”, ka shkruar Manxhuka në reagimin e tij.
Kurti ishte kërcënuar edhe më parë përmes rrjeteve sociale./Opinion.al
