Largimi i parakohshëm nga jeta i gazetares dhe ish banores së Big Brother, Adelaida Xhamani, e cila la gjurmë për përpjekjet e saj për të ndryshuar mentalitetin nga vinte, ishte tragjedi jo vetëm për familjen e saj por edhe për miqtë e njerëzit që e rrethonin.
Një ndër ta është dhe Eraldo Rexho miku dhe bashkëpunëtori i saj. Jo rrallë herë ai me anë të statuseve të ndjera ka shprehur dhimbjen për vdekjen e Adelës. Themeluesi i revistës “Who” sot një vit pas humbjes së rëndë ka postuar një tjetër shkrim për miken e tij . Ai preazantoi nismën më të re “Në vend të Adelës”.
I cili me sa duket është një projekt që dyshja e kishte ëndërruar prej kohësh. Nisma, siç thotë Eraldo ka në parim dëshirën për të ndihmuar dhe për t’i dhënë shpresë vajzave të provincave. Atyre vajzave që ëndërrojnë Tiranën. E që prej pamundësive ekonomike dhe mentalitetit, nuk arrijnë kurrë të bëhen të pavarura. Vajza që njësoj si Adelaida ëndërrojnë shkollimin dhe lirinë.
Postimi i plotë i Eraldo Rexhos:
Një vit shkoi pa ty Adela… Ti e di, na ke parë, nuk ka qenë i lehtë për asnjërin nga ne. Pa ty ‘lufta’ ka qenë më e vështirë, trishtimi më i fortë, gëzimi më i shkurtër…
Por sidoqoftë jetuam, me ty çdo ditë, ndoshta dhe për ty, për ëndrrat e tua. Ende sot është e vështirë që të besosh se ti nuk je. Cdo ditë hap whatsapp e messenger dhe mundohem të të gjej aty, dëgjoj zërin tënd, shoh fotot tona, qaj e qesh me ty, për kohën tonë, kohën e një shoqërie me ditë të paharrueshme, me lumturi, zënka, kapriço, realizime, krenari, probleme dhe me shumë shumë dashuri.
Adela, nuk e di ku je, ndoshta ja krah meje në zyrë tani që po shkruaj, por edhe nëse po më sheh e dëgjon nga lart, dije që më mungon shumë. Më mungon fjala jote, buzëqeshja, zgjidhja, e bërtitura, përkëdhelja, më mungon ti Adela…
Shumë njerëz kur humbasin dikë të afërt, i drejtohen Zotit me pyetjen: pse e solle në jetën time për kaq pak? Unë nuk ia bëj më Atij këtë pyetje Adela. Vendosa të mos ia bëj më. Madje përkundrazi, tani e falenderoj çdo ditë. Që më dha mundësinë të jetoj një shoqëri të pastër, si kristali, me një vajzë si ty, që më mësoi çdo ditë aq shumë.
Lotët ende nuk janë tharë, por kur kujtoj sesa xhan më e kishe dhe mendimi se je gjithmonë me mua, më ka bërë që të vazhdoj nismën që kishim në plan ta ndërmerrnim bashkë… “Në vend të Adelës” është projekti që prezantohet sot. Me dëshirën për të ndihmuar dhe për t’i dhënë shpresë vajzave të provincave, që ëndërrojnë Tiranën. Që prej pamundësive ekonomike dhe mentalitetit, nuk arrijnë kurrë të bëhen të pavarura e as të vendosin vetë për jetën e tyre, që njësoj si ty ëndërrojnë shkollimin dhe lirinë.
Më janë bashkuar shumë miq artistë në këtë projekt Adela. Ata që ti i doje fort dhe me ndihmën e tyre dhe të Zotit lart, shpresojmë të çojmë përpara këtë iniciativë që ti e kishe aq përzemër. Do takohemi bashkë pak ditë pas ditëlindjes tënde, në Tiranën që aq shumë e doje. Pusho në paqe engjëll! Parajsa është e jotja, unë jam krenar për këtë #GjithmonëMeMua #PërgjithmonëAdela #AdelaXhamani #NëVendTëAdelës #12Nëntor #arTurbina. /Opinion.al
