Teksa shënohet një vit nga pushtimi rus i Ukrainës, kryeministri Edi Rama ka dhënë një mesazh nga Hiroshima, pasi ndodhet në Japoni në një vizitë zyrtare.
Gjatë fjalës së tij, Rama theksoi se pas një viti të gjatë rezistence të Ukrainës nën lidershipin guximat të Presidentit Zelensky, është e qartë se Rusia nuk mund ta fitojë këtë luftë.
Për kërcënimet e Rusisë për sulme me armë bërthamore, Rama thotë se është turp të luash me fjalën bombë sikur flet për kukulla.
“Kishim shumë nga ata që menduan se pushtimi rus i Ukrainës do të ishte çështje ditësh. Ja ku jemi këtu sot, 1 vit rezistencë heroike të popullit të Ukrainës nën lidershipin guximtar të Presidentit Zelensky, me mbështetjen e botës demokratike. Është e qartë që Rusia nuk mund ta fitojë luftën, ndërkohë që dëshiroj të shtoj se kam nderin ta bëj këtë mesazh këtu nga Hiroshima pas një momenti të gjatë dhe jashtëzakonisht të veçantë nderimi në memorialin e të humburve e të zhdukurve e bombës atomike dhe pastaj në Muzeun e tmerreve të bombës atomike.
Shtoj, që të luash sot me fjalën bombë atomike sikur flet për kukulla është vërtet një turp i civilizimit tonë dhe kjo e bën edhe më të rëndësishme mbështetjen për Ukrainën dhe mbi të gjitha vendosmërinë e secilit që ka respekt për dinjitetin njerëzor, lirinë dhe vlerat e demokracisë në mënyrë që e shkuara të mbetet e shkuar dhe çdo përpjekje për ta kthyer të shkuarën të dështojë me turp”, tha Rama në mesazhin e tij.
