Një konferencë ndërkombëtare donatorësh e thirrur nga Bashkimi Europian të hënën në Bruksel mori premtime për grante në masën rreth 330 milionë euro, ndërsa projekte dhe kredi u premtuan në rreth 850 milionë euro në atë që kryeministri Edi Rama e quajti një magji përtej imagjinatës së tij më të çmendur.
Emisioni Opinion ka trajtuar pikërisht këtë zhvillim, ndërsa Gjergj Buxhuku, kreu i Konfindustrisë dha detaje.
“Qëndron ajo shifra, diku deri në 75 përqind janë në formën e huave, tjetra janë dhurata. Tek pjesa e 300 milionëshin janë të dhënë ën formën e granteve. Në radhë të parë, BE është në një ndryshim politik. Ata e kanë kuptuar që vende si Shqipëria e kanë të vështirë të marrin veten, ata do ta përdorin momentin e tërmeti në Shqipëri si pikë për të filluar një “plan Marshall”. Dhe së dyti lidhet me perspektivën për në BE. Nuk të fal asnjëri para nëse nuk ka një synim të qartë politik. Duhet pyetur edhe interesi për këto kredi”, tha Gjergj Buxhuku.
Sipas raporti të vlerësimit të dëmeve, përveç 51 viktimave dhe 900 të plagosurve, tërmeti i nëntorit “zhvendosi nga banesat e dëmtuara rreth 17 mijë njerëz. Në total prej kësaj katastrofe natyrore u prekën 202 291 persona në 11 njësi të qeverisjes vendore”.
Mbi 62 mijë janë ndërtesa e dëmtuara. Raporti i vlerësimit arriti në përfundimin se “për të përballuar efektet e dëmit dhe të ardhurave të humbura si rezultat i tërmetit, do të duheshin gati 1.08 miliardë Euro në të gjithë sektorët për rimëkëmbje. Sektorët që reflektojnë nevojat më të mëdha janë strehimi, që përfaqëson pothuajse 76 për qind të të gjitha nevojave, pasuar nga arsimi dhe infrastruktura”.
Vetëm për të përballuar dëmet e krijuara për strehim përllogaritet se do të duhen afro 696 milion euro. I gjithë dëmi është i barabartë me 6.4 për qind të Prodhimit të brendshëm bruto të Shqipërisë./ Opinion.al
