Bashkia e Tiranës ka deklaruar se trafiku do të menaxhohet në mënyrë që fluksi të reduktohet në pjesën e Unazës së Re. Në aksin rrugor që lidh Sheshin Shqiponja me Shkollën Teknologjike punimet kanë nisur edhe pse ende nuk ka dalë VKM-ja për dëmshpërblimin e objekteve që do të shemben. Ndërsa banorët protestojnë çdo pasdite në rrugë, firma ndërtuese dhe bashkia e Tiranës kanë nisur punën. Fillimisht u hoqën pemët dhe shtyllat e ndriçimit në rrugë, ndërsa tashmë janë vendosur barriera betoni, duke hequr minimalisht nga një korsi në secilin kah të rrugës.
Bashkia e Tiranës thotë se ka marrë masa për menaxhimin e trafikut dhe devijimin e mjeteve, por e verteta në terren është krejt ndryshe. Këto foto që shoqërojnë shkrimin janë shkrepur mëngjesin e sotëm në rrugën “Teodor Keko” e njohur si Unaza e Re. Trafiku është i rënduar dhe qytetarët nuk mund të arrijnë në destinacionet e tyre.
Ja çfarë thotë zyrtari i bashkisë:
“Kemi bërë një plan menaxhimi që do t’i japë prioritet rrugës ‘Dritan Hoxha’ dhe Rrugës së Kavajës, ndërsa jemi duke punuar shumë fort me rrugët alternative, siç është rruga “Tre Dëshmorët”, që i shërben zonës së Kasharit. Ne besojmë që nuk do të ketë bllokim trafiku, por do të ketë mbingarkesë dhe qytetarët duhet të kenë mirëkuptim, pasi është një nga akset kryesore të qytetit të Tiranës, që i shërben të gjithë qytetit, jo vetëm zonës aty”, deklaroi dje drejtori i Transportit në Bashkinë e Tiranës, Enton Punavija.
/Opinion.al
Fotot e trafikut në dy kahet e rrugës, e hënë 3 Dhjetor: Unaza e Re
