Hetimet që po kryheshin nga Prokuroria e Posaçme për një çështje të abuzimit me tenderat e Ministrisë së Shëndetësisë zbuloi korrupsionin e kryer nga zyrtarët e këtij institucioni.
Kjo u evidentua gjatë seancës gjyqësore ndaj sekretares Joana Duro dhe specialistes Laura Shteto që u arrestuan me urdhër të SPAK. Gjyqtarja Atalanta Zeqiraj caktoi ndaj tyre arrest në burg pa afat. Kryesuesja e seancës vendosi të pranojë kërkesën e dy prokurorëve, Vladimir Mara dhe Dritan Prenci.
“Dy zyrtaret e Ministrisë së Shëndetësisë gjatë seancës gjyqësore zgjodhën të mos japin shpjegime por të përfaqësohen nga avokatët mbrojtës”.
Në seancën që zgjati 90 minuta, avokatët Antoneta Sevdari dhe Emir Bleta kërkuan masë më të lehtë për klientët e tyre, por që u rrëzua nga trupa gjykuese.
Kërkesa u refuzua pas përgjimeve dhe provave të paraqitura nga prokuroria. Zyrtaret e Ministrisë akuzohen për korrupsion pasiv, pasi morën 330 mijë lekë ryshfet për të favorizuar një kompani private për fitimin e një tenderi. Bëhet fjalë për supervizimin e rikonstruksionit të qendrave shëndetësore në qarqet Tiranë dhe Durrës me vlerë 805 mijë lekë.
Hetimet zbuluan se shuma e parave fillimisht iu dha inxhinierit Silvi Shehi nga Vladimir Topi, në banesën e tij dhe më pas ia dërgoi Laura Shteto-s, e cila ishte personi që kishte njohje dhe mbante kontakte me sekretaren e Ministrisë. Shuma e parave u gjet në zyrën e sekretares, menjëherë pas arrestimit nga policia.
Në gjykatë pritet të dalin të martën edhe administratori i kompanisë Dricons që fitoi tenderin dhe inxhinieri, të cilët u arrestuan në fundjavë./ Klan News
