Dy ditë më parë në Durrës u arrestuan 17 persona pasi dyshohen se kanë shpërdoruar detyrën duke lejuar ndërtimin e godinave pa leje.
Mes të arrestuarve janë dy shefa policie, efektivë policie, inspektorë vendor apo përfaqësues të pushtetit lokal dhe ndërtues.
Detaje të zbardhura nga dosja e tyre tregojnë se ata janë zbuluar si pasojë e denoncimeve në komisariatin dixhital, i cili ka zbuluar shkeljet e tyre, prej ku rezultonte se ata iu bënin foto objekteve të ndërtuara pa leje, por më pas i tjetërsonin dhe i fshinin.
Ndër të tjera në dosje zbulohet se një nga efektivët e policisë nuk ka arrestuar një person të akuzuar për përdhunim. Konkretisht, specialisti i krimeve, nënkomisari Ermand Petova ishte ngarkuar nga Prokuroria për arrestimin e një personi në nëntor të 2019 pasi ai kishte përdhunuar një minorene. Petova kishte referuar se nuk e kishte gjetur në shtëpi personin por nga përgjimet e kryera rezultonte se ai kishte njohje me të dhe megjithëse e kishte gjetur në shtëpi nuk kishte kryer arrestimin.
“Më datë 05.11.2019, nga ana e specialistit të krimeve, nënkomisarit E., janë referuar materialet në Prokurorinë pranë Gjykatës së Shkallës së Parë Durrës, për shtetasin S., i datëlindjes 25.09.1987, banues në fshatin R., Durrës, me arsim 8 klasë, i papunë, sepse më datë 03.11.2019, ka bërë kallëzim shtetasja V., se në mesin e muajit qershor 2019, në fshatin Rrotull, gjatë rrugës për në shtëpi, në automjet ka kryer marrëdhënie seksuale pa dëshirën e saj dhe është raportuar se po punohet për kapjen e tij, për veprën penale ‘Marrëdhënia seksuale me dhunë me të rritura’. Ky shtetas është shpallur në kërkim më datë 05.11.2019 me kartelë ngjyrë ‘rozë’, pasi akuzohet për veprën penale ‘Marrëdhënie seksuale me dhunë me të rritura’. Specialisti i krimeve, E., ka raportuar se ka vajtur për kontroll banese te banesa e shtetasit S., dhe nuk e ka gjetur në banesë. Nga bisedat telefonike me personin në kërkim, rezulton se ka njohje me të dhe është në dijeni se ndodhet në banesë dhe nuk kryen detyrën funksionale për të shoqëruar dhe kryer veprimet procedurale.
Më pas, nën drejtimin e prokurorit u kërkua që të kryhen veprime procedurale për të provuar faktin, por për shkak të njohjes dhe marrëdhënies së OPGJ, E., dhe të dyshuarit S., nuk pati rezultat për provuar veprën penale. Nga transkriptimi i bisedave telefonike rezulton se ka dijeni dhe punonjësi i Policisë P.”, thuhet në dosjen e Prokurorisë së Durrësit.
Nga dosja rezulton gjithashtu se zyrtarët i lejonin ndërtimet pa leje kundrejt pagesave që varionin nga 1500 deri në 7 mijë euro.
HETIMET PËR SHPËRDORIM DETYRE
Prokuroria pranë Gjykatës së Rrethit Gjyqësor Durrës, mbi bazën e materialit referues të përgatitur nga Shërbimi për çështjet e Brendshme dhe Ankesat, sektori Durrës, ka regjistruar procedimin penal nr. 2042, datë 30.09.2019, për veprën penale “Shpërdorimi i detyrës”. Më datë 03.10.2019, është proceduar me regjistrimin e emrit, si person ndaj të cilit zhvillohen hetime, të shtetasve A. 0., dhe G. D., si të dyshuar për veprën penale “Shpërdorimi i detyrës”, parashikuar nga neni 248 i Kodit Penal. Më datë 06.01.2020, është proceduar me regjistrimin e emrit, si person ndaj të cilit zhvillohen hetime, të shtetasve A. 0., dhe G. D., S. X., N. M., E. P., B. D., D. D., P. N., H. S., N. Sh., A. N., G. 0., M. S., J. K., si të dyshuar për veprën penale “Shpërdorimi i detyrës”. Ndërsa për shtetasit A. L., Q. D., G. Z., P. M., dhe D. K., si të dyshuar për veprën penale “Ndërtimi i paligjshëm”. Nga hetimi i kryer dhe aktet e administruara, rezulton se: Shërbimi për Çështjet e Brendshme dhe Ankesat, sektori Durrës – Lezhë, ka dijeni se disa punonjës së Policisë në Komisariatin e Policisë Durrës (me detyrë specialistë të Policisë së zonës SPZ), kanë ardhur dijeni për shkak të detyrës për ndërtime të paligjshme dhe vepra të tjera penale, në territorin që ushtrojnë detyrat e tyre funksionale dhe me mosveprime, kanë lejuar shtetas të ndryshëm për të ndërtuar pa leje, duke mos kryer veprime procedurale për referimin e këtyre veprave penale te prokurori. Më datë 02.10.2019, është proceduar me këqyrjen e regjistrit të kallëzimeve dhe procedimeve penale në këtë Prokurori dhe ka rezultuar se për disa nga objektet (të përshkruar në referimin e Policisë), te të cilët po kryheshin punime pa leje, konkretisht për shtetasit Q. D., në fshatin Jubë (zonë e cila mbulohet nga SPZ – A. 0.), dhe objekti në emër të shtetasit P. M., në fshatin Rrushkull (zonë e cila mbulohet nga SPZ – G. D.), nuk kishte referim te prokurori. Policia Gjyqësore e SHÇBA Durrës-Lezhë, gjatë këqyrjes së objekteve në emër të shtetasve, ka konstatuar dhe objekte të tjera që po ndërtoheshin pa leje, të cilat nuk janë raportuar në regjistrin e ngjarjeve në Polici apo të jenë referuar në Prokurori. Këto objekte janë ndërtuar pa leje nga shtetasit: 1- I. K., në lagjen Bishtkamëz, 2- A. L., në Katund të Ri, dhe 3- G. Z., në fshatin Rrushkull, për të cilët pavarësisht se kishte referim në Prokurori, ata vazhdonin të kryenin punime ndërtimi pa leje, me pëlqimin e punonjësve të Policisë (SPZ – të zonës për katëse). Në funksion të hetimit të këtij procedimi, është kërkuar nga Policia Gjyqësore dhe janë aplikuar metoda speciale të hetimit, nëpërmjet përgjimit telefonik të xxxxx dhe i vëzhgimit në ambiente publike të objekteve dhe personave të dyshuar. Më pas, kanë rezultuar se ka dyshime dhe për shtetas të tjerë, të cilët janë lejuar me vendimet me nr. 281, datë 04.10.2019, nr. 28111, datë 14.10.2019, nr. 281/2, datë 19.10.2019, nr. 281/3, datë 29.10.2019, nr. 281/4, datë 04.11.2019 dhe nr. 281/5, datë 27.12.2019 të Gjykatës së Shkallës së Parë në Durrës. Ndërkohë, është autorizuar nga prokurori vëzhgim në ambiente publike të objekteve dhe pronarëve të tyre, si dhe punonjësve të Policisë që kishin detyrë të ndalonin dhe referonin ndërtimet pa leje. /Opinion.al
