Zyrtare, Kuvendi nuk do të mblidhet ditën e enjte. Kreu i Kuvendit, Gramoz Ruçi në një konfrencë për mediat tha se duhet t’i krijojmë opozitës hapësira kohore reflektimi dhe mundësi të rikthimit në institucione.
“Nuk do doja kurrë djegien e mandateve, i bën vendit një dëm shumë të madh. Mesazhet e SHBA dhe BE më kanë lënë shijen e hidhur, një skenar i tillë i padëgjuar është një lloj kamikazllëku politik që hedh në herë të zotët e punës por dëmton dhe të tjerët. Nuk është ky momenti që të komentoj për këtë skenar nga këndvështrimi si kundërshtar i opozitës, por ultimatumet nuk bëjnë gjë dhe pushtetit nuk merret në tavolinë. Si kryetar i Kuvendit duhet të them sot se nuk ka opozitë më të lirë se kjo, për lirinë e shprehjes nuk ka patur. Për mua është normale që opozita të kërkojë zgjedhje të parakohëshme, por të kërkojë pushtet në tavolinë kjo nuk është normale. Si mundet që opozita të braktis detyrën dhe të lërë zgjedhësit e saj pa zë në Parlament. Si mundet që opozita të mendojë që debati zgjidhet në rrugë dhe jo në Parlament?”, theksoi Ruçi.
Lulzim Basha ka kërkuar dorëheqjen e Kryeministrit Rama dhe krijimin e një qeverie tranzitore që do të çojë vendin në zgjedhje të parakohshme. Të dyja kërkesat deri më tani Kryeministri i ka përjashtuar në mënyrë kategorike dhe ato nuk kanë gjetur as mbështetjen e ndërkombëtarëve.
Herët në mëngjes, në selinë e PD-së mbërriti ambasadorja e Gjermanisë, Susanne Schutz, e më pas ambasadori i BE, Luigi Soreca. Në përfundim të takimi, Soreca u shpreh se temë e diskutimit me kreun e PD ishte vendimi i tij për të djegur mandatet, por edhe protesta që do të zhvillohet të enjten para Kuvendit. G.F Opinion.al
