Komisioni Komunal i Zgjedhjeve në Tuz ka shpallur sot rezultatet e zgjedhjeve që u mbajtën dje në komunën e Tuzit, ku koalicioni “Forumi Shqiptar” është fitues me 16 vende në parlamentin lokal. Në vend të dytë renditet Partia Demokratike e Socialistëve me 10 mandate, Partia Boshnjake me 4 të tilla, Social Demokratët dhe Demokratët me nga një mandat.
Rezultatet duhet të ishin shpallur mbrëmë, por kryetari i Komisionit Komiunal Zgjedhor Shtjefën Ujkaj refuzoi t’i nënshkruante, gjë që e bëri vetëm sot.
Nikë Gjeloshaj ishte kandidati i përbashkët i koalicionit të tre partive: Alternativa Shqiptare, Lidhja Demokratike Shqiptare dhe Unioni Demokratik Shqiptar. Koalicioni “Forumi Shqiptar”, gjatë fushatës garoi me parullën “Malësia na bashkon”.
Treva e Malësisë së Madhe me shumicë shqiptare, Tuzi, u shpall komunë shtatorin e kaluar, pas përpjekjeve prej mbi 3 dekadash të partive shqiptare, për t’u shkëputur nga administrimi si pjesë e Podgoricës dhe ka 40 fshatra./Opinion.al
