42 të arrestuar dhe 60 të proceduar për protestës e së dielës nga opozita. Sipas policisë së Tiranës gjatë protestës në rrugën “George W. Bush” pjesëmarrësit në tubim kanë kundërshtuar, goditur me mjete të forta, fishekzjarrë, tymuese dhe kapsolla me fuqi të lartë shpërthimi punonjësit e Policisë, të vendosur me shërbim para Kryeministrisë dhe selisë së Parlamentit të Shqipërisë.
Nga goditjet, kundërshtimet dhe përdorimi i lëndëve piroteknike, sendeve të forta, kapsollave e fishekzjarrëve kanë mbetur të plagosur 10 efektivë, thekson policia.
Po ashtu theksohet se si pasojë e përdorimit të lëndëve piroteknike, fishekzjarrëve, kapsollave e sendeve të tjera janë shkaktuar dëme të konsiderueshme në godinën e Kryeministrisë dhe selisë së Parlamentit.
“Bazuar në prova, pamje filmike, raporte shërbimi u arrestuan në flagrancë 42 persona, si dhe janë proceduar në gjendje të lirë 17 persona të tjerë për kryerjen e veprave penale “Organizimi dhe pjesmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës”, “Prishja e qetësisë publike”, ”Shkelja e rregullave mbi lëndët plasëse, djegëse dhe radioaktive”.
Në gjendje të lirë, si pas çdo proteste është proceduar dhe Sekretari i Përgjithshëm i Partisë Demokratike, Gazmet Bardhi. Kryetari demokrat Lulzim Basha ashpërsoi tonet në mbyllje të protestës së opozitës, mbrëmjen e së dielës në Tiranë, kur kërcënoi se “e sotmja është dita e fundit ku unë ju drejtohem me argumentet e arsyes, sepse koha për fjalët po mbaron dhe në protestën e ardhshme fjalën do e ketë vetëm sovrani, vetëm populli”. Manifestimi i radhës do të jetë të shtunën, në orën 19:00. / Opinion.al
