Të gjitha zyrat e aplikimit për kartat e identitetit dhe pasaportat janë të hapura edhe ditën e shtunë.
Lajmi është bërë i ditur nga drejtori i Përgjithshëm i Gjendjes Civile Bledar Doracaj, i cili i ka ftuar të gjithë shtetasit shqiptarë, të cilëve iu ka skaduar apo iu skadon në ditën në vijim pasaporta dhe kartat e identitetit, të aplikojnë për dokumentet biometrike.
“Duke përfituar nga rasti, edhe pse është ditë e shtunë, shërbimet e Drejtorisë së Përgjithshme të Gjendjes Civile, zyrat e gjendjes civile në bashki, njësi administrative, gjithkund ku ka zyra aplikimi për pasaporta dhe ID kartë e kanë një ditë normale pune. Duke i ftuar të gjithë shtetasit shqiptarë, të cilëve iu ka skaduar apo iu skadon në ditën në vijim pasaportat dhe ID kartat, të vijnë e të aplikojnë për dokumentet biometrike” tha Bledar Doracaj.
Doracaj iu ka bërë thirrje qytetarëve të të aplikojnë për marrjen e shërbimit në kohë dhe të mos t’i lënë për ditën e fundit.
“Është një numër ende i lartë, edhe pse ka patur një përgjigje pozitive deri më tani nga shtetasit shqiptarë, ka një numër relativisht të lartë, i cili duhet të marrë zgjidhje dhe qytetarët duhet t’i drejtohen zyrave të aplikimit për t’u pajisur me to. Edhe njëherë ju lutem brenda afatit, të mos t’i lëmë për ditën e fundit.
Çdo shërbim është i lidhur me dokumentin biometrik, çdo udhëtim është i lidhur me pasaportën biometrike”, tha ai./Opinion.al
