Shkodra është tashmë një nga qytetet kryesore, që pas Tiranës, Kavajës, Fierit, Krujës dhe Gjirokastrës do të çelë qendrën e integruar ADISA, me qëllim ofrimin e shërbimeve publike të standardizuara, konsideruar një nga prioritetet e qeverisë shqiptare.
Lajmi për çeljen e zyrës në Shkodër, bëhet i ditur nga Zëvendës Kryeministrja Mesi në rrjetin e saj social facebook.
Në krye të reformës në administratën publike, Mesi informon se deri në fund të vitit 2018-të, Shkodra do të ketë qendrën e saj të integruar ADISA,që parashikohet të ofrojë mbi 330 shërbime të 9 institucioneve shtetërore mes të cilave edhe Zyra Vendore e Regjistrimit të Pasurive të Paluajtshme, Drejtoria Rajonale e Sigurimeve Shoqërore, Tatimet, Posta Shqiptare etj
“Shërbime të standardizuara, luftë ndaj korrupsionit, më pak kohë e shpenzuar për qytetarët e sipërmarrësit, si dhe më tepër efiçiencë e transparencë për çdo shërbim të ofruar”,shkruan Mesi, në postimin e saj, duke nënvizuar faktin se kjo qendër e re do të reduktojë ndjeshëm kohën dhe ngarkesën për marrjen e shërbimeve publike.
Qendra e integruar ADISA në Shkodër, një nisëm e mbështetur dhe nën vëmendjen e veçantë të Zëvendës Kryeministres Mesi, parashikohet të çelet në godinën aktuale të konviktit “Safet Spahiu”, ku do të ketë rreth 20 sportele shërbimi dhe mbi 30 të punësuar.
