Mbetjet e një alpinisti gjerman, i cili u zhduk gjatë ecjes përgjatë malit Matterhorn të Zvicrës në vitin 1986, janë gjetur pasi shkrirja e akullnajave ka çuar në rishfaqjen e trupave dhe objekteve që mendohet se janë zhdukur prej kohësh.
Zbulimi i tmerrshëm u bë më 12 korrik nga alpinistë që ecnin përgjatë akullnajës Theodul në Zermatt, tha policia.
“Analiza e ADN-së mundësoi identifikimin e një alpinisti i cili ishte zhdukur që nga viti 1986”, thuhet në një deklaratë të policisë.
“Në shtator 1986, një alpinist gjerman, i cili në atë kohë ishte 38 vjeç, ishte raportuar i zhdukur pasi nuk u kthye nga një shëtitje”.
Policia nuk ka dhënë informacion shtesë për identitetin e alpinistit dhe as për rrethanat e vdekjes së tij. Megjithatë, ajo publikoi një foto të pjesës së këmbës që i përkiste personit të zhdukur.
Eshtrat e alpinistit iu nënshtruan një analize mjekoligjore në Spitalin Valais, duke lejuar ekspertët t’i lidhnin ato me zhdukjen e vitit 1986, tha policia.
Tkurrja e akullnajave për shkak të ndryshimeve klimatike ka çuar në zbulimin e trupave të alpinistëve që u zhdukën gjatë dekadave të fundit.
Në vitin 2015, u gjetën eshtrat e dy alpinistëve të rinj japonezë që u zhdukën në Matterhorn në një stuhi dëbore të vitit 1970 dhe identiteti i tyre u konfirmua përmes testit të ADN-së të të afërmve të tyre.
Vitin e kaluar akullnajat e Zvicrës regjistruan shkallën e tyre më të keqe të shkrirjes që nga fillimi i regjistrimeve më shumë se një shekull më parë, duke humbur 6% të vëllimit të tyre të mbetur – gati dyfishi i rekordit të mëparshëm në 2003./Opinion.al
