Mark Zuckerberg ka folur për disa ndryshime në kompanitë që administrohen prej tij, duke përfshirë jo vetëm Facebook por edhe Instagram dhe Whatsapp. Ndryshimet e reja kanë për qëllim që t’u japin përgjigje të gjithë kritikëve për mënyrën se si këto rrjete sociale administrojnë dhe ruajnë të dhënat e përdoruesve. Zuckerberg ka thënë se tashmë privatësia do të jetë shtylla më e rëndësishme.
Sipas asaj që raporton BBC, disa prej ndryshimeve më të dukshme do të jenë:
- Mesazhet e dërguara në Messenger do të enkriptohen “end-to-end”, që do të thotë se as Facebook nuk do të ketë akses për të parë mesazhet. Ato do t’i përkasin vetëm dy personave që bisedojnë dhe platforma do të integrohet tërësisht me Whatsapp.
- Nga ana tjetër, Instagram po eksperimenton “llogaritë me pëlqime private”, që do të thotë se “pëlqimet” nuk do të mund të shihen nga të tjerët, por vetëm nga ai që ka postuar foton ose videon.
- Do të ketë më shumë mënyra “kalimtare” për të shpërndarë mesazhet. Pra nuk do të ketë një regjistrim të plotë të tyre.
- Whatsapp po eksperimenton një shërbim pagese në Indi dhe mendohet që deri në fund të vitit ky opsion të shpërndahet edhe në vendet e tjera.
- Në Instagram nuk do të shpërndahen vetëm foto dhe video, por do të jetë e mundur të përdoret edhe thjesht teksti, figurat apo grafika të tjera./Opinion.al
