Luftë taksash mes gjigantëve të teknologjisë dhe Europës. Kështu mund të cilësohet debati i madh që ka përfshirë prej kohësh vendet e Europës me shërbimet digjitale të Apple, Facebook, Google, e tjerë.
Në mes të debatit të nxehtë, drejtuesi i rrjetit më të madh social në botë, Facebook, Mark Zuckerberg, ka deklaruar se e pranon që në të ardhmen kompania e tij mund të paguajë më shumë taksa në kontinentin europian.
Zuckerberg ka thënë po ashtu se mbështet planet e Organizatës për Bashkëpunim Ekonomik dhe Zhvillim për të gjetur një zgjedhje globale, të pranueshme nga të gjitha palët.
Facebook, por edhe kompani të tjera si Google, Youtube, Apple e tjerë janë akuzuar vazhdimisht nga Europa se nuk kanë paguar shumën e duhur të taksave në shtetet ku veprojnë.
Kështu, Mbretëria e Bashkuar ka thënë se po planifikon të prezantojë taksa të reja për shërbimet e saj digjitale në muajin prill, pavarësisht kundërshtimeve të SHBA-së. Ndërsa, Franca ka rënë dakord për të shtyrë vënien e taksave në shitjet digjitale deri në fund të vitit, duke lënë mundësinë e arritjes së një marrëveshjeje globale.
Në anën tjetër, SHBA pretendon se kompanitë amerikane po shënjestrohen padrejtësisht në Evropë, ndaj në shenjë hakmarrjeje, Uashingtoni ka kërcënuar me vënien e tarifave në disa produkte ushqimore franceze.
