Preç Zogaj tha se sheh vetëm një zgjidhje ligjore në përplasjen mes Bashës dhe Berishës lidhur me çështjen e drejtimit të Partisë Demokratike. I ftuar në emisionin “Opinion”, Zogaj edhe një herë e vuri theksin në faktin që Shtetet e Bashkuara të Amerikës janë shprehur se nuk do të bashkëpunojnë me persona non grata.
“Këshu siç kanë ardhur punët kjo është vetëm betejë ligjore, nuk shoh ndonjë rrugë tjetër. Me shumë keqardhje e them, nuk shoh hapësirë tjetër për momentin përveçse një zgjidhje ligjore. Pozitive është fakti që pala e Berishës ka dërguar në gjykatë. Statutet janë kushtetutat e partive, ato i gjykojnë juristët. Nëse jepet vendimi pranohet vendimi i gjykatës. Për të ardhmen është shpejt për të diskutuar, mendoj që përgjatë rrugës do të ndodhë një bashkim. Sepse grupi i Berishës përbëhet nga disa nëngrupe që janë aty për motive të ndryshme. Kanë një të përbashkët se duan të largojnë Bashën, por kanë edhe motive. Një pjesë mendojnë që po përdorin Berishën. Berisha mendon se po i përdor ata, dhe është më e saktë kjo. Me kalimin e kohës do vijë momenti që do reduktohen motivet. Do ngelë një motiv aty, do zgjedhin me non grata-n apo jo. Kjo do jetë zgjedhja e fundit. SHBA-të kanë paralajmëruar që nëse këtë parti e merr një person i shpallur non grata, kushdo qoftë ai SHBA-të do ndërpresin marrëdhëniet me PD-në”, tha Zogaj.
