Fusha e vendgrumbullimit të mbeturinave në lagjen “24 Maji” të qytetit të Vlorës është përfshirë nga flakët parditen e kësaj të shtune.
Lidhur me këtë situatë në qytetin bregdetar, ka ardhur një reagim nga kryetari i Bashkisë së Vlorës, Ermal Dredha.
Përmes një postimi në rrjetet sociale, Dredha e konsideron të patolerueshme dhe të dënueshme zjarrëvënien në fushën e mbetjeve në Vlorë.
Po ashtu Dredha thotë se kanë bërë kallëzim penal për këtë ngjarje, përfshirë edhe për institucionet në varësi të Bashkisë, që kanë për detyrë të monitorojnë moslejimin e këtyre situatave.
Postimi i plotë i Dredhës:
“Si pasojë e një rrethane të përsëritur dhe të patolerueshme të zjarrëvënies së qëllimshme apo papërgjegjshmërisë njerëzore, në fushën e mbetjeve, bashkia në bashkëpunim me Policinë e Shtetit ka bërë kallëzim penal për të gjitha hallkat që duhet të monitorojnë dhe kujdesen që ngjarje të tilla të mos ndodhin më, përfshi edhe institucionet që varen nga bashkia. Organet ligjzbatuese janë vënë në veprim për të dënuar cilindo që përpiqet të dëmtojë imazhin e qytetit në nisjen e sezonit turistik.
Sidoqoftë, janë marrë masat e menjëhershme për shuarjen e zjarrit dhe mospërsëritjen e kësaj ngjarje të shëmtuar.”
