Një zjarr në banesë i orëve të para të mëngjesit i ka marrë jetën deri tani 10 personave dhe 36 të tjerë janë plagosur. Ngjarja ka ndodhur në Paris, në një pallat 8 katësh rreth orës 1 të së martës. Policia arrestoi një grua rreth të 40-ave me probleme mendore.
Janë konfirmuar dyshimet se zjarrvënia ka qenë e qëllimshme. Sipas dëshmive nga fqinjët, gruaja kishte debatuar me fqinjin 22 vjeçar, me profesion zjarrfikës. Ai kishte trokitur në derën e saj për t’i kërkuar të ulte volumin e muzikës.
“Isha duke fjetur. Një grua sipër meje dëgjonte natën muzikë me zë të lartë. Një djalë ngjiti shkallët dhe i trokiti fortë në derë, duke i bërtitur “boll, boll, boll. Ajo iu përgjigj po ashtu duke bërtitur – Ti je zjarrfikës apo jo? Po sikur unë t’i vë flakën? Dhe më pas ndodhi ajo që patë”, tha një fqinje.
Sipas hetuesve dhe dëshmive të fqinjve, gruaja ishte problematike dhe ishte shoqëruar shpesh në polici për probleme të kësaj natyre. Më shumë se 200 zjarrfikës u angazhuan në shuarjen e flakëve, 6 prej tyre mbetën të lënduar. Gjatë ditës së sotme bilanci i viktimave është thelluar. Pritet të thellohet edhe më tej pasi shumë të plagosur janë në gjëndje kritike për jetën./E.L
