Drejtori i Shërbimit Zjarrfikës të Tiranës, Shkëlqim Goxhaj, zhvilloi një intervistë me gazetarin Besard Jacaj pas zjarrit që ra në një pallat në Komunën e Parisit këtë të shtunë.
Ai theksoi se zjarri është shuar dhe tashmë vazhdohet me ekspertizën për të gjetur shkakun e ngjarjes. Sipas tij janë djegur tre automjete. Shkaku i zjarrit mendohet të ketë ardhur nga këto automjete ose nga kabujt që ndodheshin në garazh.
“Mendojmë që edhe shkaku i ngjarjes aty ka qenë. Gjithashtu ka edhe kabuj të shumtë elektrikë që janë dëmtuar, prandaj edhe ekspertiza do dojë pak kohë që të japë rezultatet përfundimtare, ku ekspertët tanë dhe të policisë së shtetit janë në vendin e ngjarjes”,tha Goxhaj.
I pyetur nëse mendon se zjarri ka qenë i qëllimshëm, Goxhaj tha se nuk e beson diçka të tillë.
“Nuk besoj të jetë e qëllimshme, nuk ka pasur as shkak, as arsye që të jetë e qëllimshme, por kjo është një ngjarje që ka ndodhur spontanisht, ndoshta për efekt të mjetit ose kabujve elektrikë që janë aty pranë”, tha ai.
Sa i përket kabujve elektrikë, drejtori i zjarrfikëses tha se gjatë ditëve të ftohta të dimrit ato kthehen shpesh në problem për shkak të ngarkesës së lartë.
