Policia ka reaguar në lidhje me zjarrin me përmasa të mëdha që përfshiu një zonë malore në qytetin e Laçit.
Uniformat blu bëjnë me dije se për këtë incident kanë vënë në pranga 41-vjeçarin V.H i cili duke djegur disa mbeturina ka shkaktuar zjarrin që është përhapur më shumë si pasojë e erës.
Mësohet se në vendin e ngjarjes janë angazhuar shërbimet policore të Komisariatit të Policisë Kurbin, të Drejtorisë Vendore të Policisë Lezhë, forcat “Shqiponja” si dhe 4 grupe nga FNSH të ardhur në mbështetje.
“Shërbimet e policisë, pas njoftimit të marrë se në një zonë malore në lagjen nr.4 në Laç, kishte rënë zjarr i cili kishte marrë përmasa duke rrezikuar edhe banesat përreth, menjëherë kanë mbërritur në vendngjarje për tu angazhuar me qëllim fikjen e tij si dhe për të kryer veprimet hetimore për përcaktimin e shkakut.
Si rezultat i veprimeve të shpejta e profesionale hetimore të kryera, ka rezultuar se shkaku i rënies së zjarrit ishte djegia e disa mbeturinave nga shtetasi V. H. 41 vjeç, zjarr i cili duke u favorizuar nga kushtet atmosferike, ka marrë përmasa duke djegur një sipërfaqe masive me bimësi si dhe duke rrezikuar edhe banesat përreth.
Shtetasi V. H. u arrestua në flagrancë.
Në vendin e ngjarjes, në bashkëpunim të ngushtë me shërbimin zjarrfikës dhe përfaqësuesit e institucioneve të tjera përgjegjëse, me qëllim fikjen e zjarrit, janë angazhuar shërbimet policore të Komisariatit të Policisë Kurbin, të Drejtorisë Vendore të Policisë Lezhë, forcat “Shqiponja” si dhe 4 grupe nga FNSH të ardhur në mbështetje. Në krye të këtyre shërbimeve policore të angazhuara, në vendin e ngjarjes, ndodhet edhe Drejtori Vendor i Policisë Lezhë Drejtues Alfred Elezi”, tha policia./Opinion.al
