Detaje të reja kanë dalë lidhur me ngjarjen e rëndë të ndodhur në komisariatin numër 5 në Tiranë, ku pas zjarrit të rënë humbi jetën 26-vjeçari Arben Mici dhe u plagosën i pandehuri Dilaver Idrizi dhe efektivi i policisë Hajredin Boja.
Klan News raporton se punonjësi i policisë, Hajredin Boja ende nuk ka dhënë deklarime për shkak të gjendjes shëndetësore. Ndërsa i plagosuri tjetër, Dilaver Idrizi është shprehur se është nxjerrë nga dhomat e izolimit nga punonjësi i policisë, Boja (përgjegjësi i dhomave të izolimit).
Ndërkohë këtë të hënë është publikuar edhe fotoja e 26-vjeçarit Arben Mici që humbi jetën si pasojë e zjarrit.
Autoritetet po vijojnë hetimet, ndërkohë që burime nga grupi hetimor bëjnë me dije se zjarri ka rënë në orën 20:53 dhe rreth 30 minuta më pas kanë mbërritur forcat zjarrfikëse. Fillimisht, dy efektivët kanë tentuar të shuajnë zjarrin vetë dhe kur flakët janë përhapur, janë telefonuar forcat zjarrfikëse./Opinion.al
