Zjarri masiv që përfshiu Katedralen “Notre Dame” në Paris, me shumë mundësi është aksidental.
“Asgjë nuk sugjeron se ishte një akt vullnetar. Ne mbështesim teorinë e një aksidenti, ndërkohë që një ekip prej 50 personash janë angazhuar në një hetim për të zbuluar sesi filloi zjarri. Ky do të jetë një hetim i gjatë dhe kompleks”,deklaroi Remy Heitz, prokuror i Parisit.
Zyra e tij tha për mediat se policia kishte nisur të merrte në pyetje punëtorët e ndërtimit, që po kryenin rinovimin e katedrales pavarësisht se kontraktori pretendon se janë respektuar të gjitha rregullat.
Nga ana tjetër Presidenti francez, Emmanuel Macron premtoi se do të rindërtojë godinën historike me çdo kusht, teksa tha se një fushatë kombëtare për mbledhjen e fondeve për të rivendosur Notre Dame do të fillojë të martën. Deri më tani një numër kompanish dhe biznese të fuqishme kanë premtuar 600 milionë euro për rindërtim.
Oferta për ndihmë kanë ardhur nga i gjithë globi, nisur nga presidenti i Këshillit Europian, Donald Tusk, që iu kërkoi vendeve anëtare të veprojnë./Opinion.al
