Një zjarr i përmasave të mëdha ka përfshirë një fabrikë të plastikës brenda ambienteve të ish-Metalurgjikut në Elbasan këtë të mërkurë.
Për ngjarjen ka ardhur një reagim nga shefi i shërbimit zjarrfikës në Elbasan, Emirjon Sota.
Sota, përmes një deklarate për mediat, ka ndarë detaje të reja në lidhje me zjarrin. Ai shprehet se zjarri ka rënë në pjesën e jashtme të fabrikës, por me ndërhyrjen e shpejtë, u lokalizua dhe shua.
“Siç jemi njoftuar rreth orës 14:40 për një zjarr të rënë në një fabrikë përpunimi plastike, ku zjarri ka përfshirë pjesën e jashtme, janë përfshirë tuba plastikë dhe arka, është bërë izolimi i vatrës së zjarrit duke shpëtuar fabrikat që ndodheshin ngjitur. Në operacion kanë marrë pjesë 10 mjete zjarrfikëse nga bashkitë e qarkut dhe ushtria. Rreth 40 efektivë zjarrfikës, të cilët bënë të munduar shuarjen. Nga ky zjarr nuk ka asnjë të lënduar. Paraprakisht shkaku dyshohet aksidental”, u shpreh Sota.
Ndërkohë, Ilir Llapushi, shef i shërbimit zjarrfikës në Gramsh, shtoi:
“Janë zjarre të vështirë sepse janë lëndë plastike dhe lëndë lehtësisht të djegshme. Duhet të punoish me kundragaz, por me mbështetjen e qarkut dhe Tiranës, u bë lokalizimi i plotë i zjarrit deri në shuarjen e tij.”
