Inspektorati Shtetëror Teknik dhe Industrial deklaron se ngjarja në burgun e Shënkollit në Lezhë nuk ka ndodhur për shkak të shpërthimit të bombolës, siç pretendon MD.
“Bombola e gazit që përdorej për gatim ishte e paprekur. Inspektorët tanë kryen verifikime në vendngjarje”, citohet në reagimin e ISHT-së.
Kujtojmë se më herët Ministria e Drejtësisë në një komunikatë për mediat, shkruante se ” në burg është vënë re prezence zjarri në njerën nga qelite e ketij insitucioni. Dyshimet paraprake lidhen me nje zjarrvenie aksidentale si pasoje e shperthimin te nje bombule gazi per gatim”.
Ndërkohë referuar burimeve të Opinion.al mësohet se ngjarja ka ndodhur pas një konflikti mes të burgosurve. Një grup i ka vënë flakën dhomës së grupit tjetër. Për pasojë ka humbur jetën Fatmir Sula nga Miloti dhe 8 të tjerë janë plagosur. Ka akuza nga të burgosurit se është ndërhyrë me vonesë për shuarjen e flakëve.
