Zjarrvënia në burgun e Shënkollit mund të jetë vënë nga vetë viktima Flamur Sula. Nga hetimet dhe dëshmitë e marra, mendohet se ky është shkaku që shkaktoi zjarrin në qelinë 5 të godinës numër 1 dhe më pas u përhap në ndërtesë.
Mësohet se i dënuari me 10 vjet burg, Flamur Sula, banor i fshatit Malbardhë të Kurbinit, vetëm 10 minuta përpara se të ndodhte ngjarja e rëndë, kishte folur në telefon me familjen. Ky fakt është pohuar për hetuesit nga një prej shokëve të Flamur Sulës, me të cilin ai kishte komunikuar vetëm pak momente përpara ngjarjes.
Menjëherë pas komunikimit me pjesëtarët e familjes, mësohet se 25vjeçari është kthyer në qelinë e tij i shqetësuar. Në këtë kohë tre shokë të tjerë të qelisë së tij ndodheshin në ajrim. Pikërisht në këtë kohë dyshohet se ka ndodhur edhe rënia e zjarrit, nga disa bombola gazi, të cilat dyshohet se kanë qenë të vendosura poshtë dyshekut të shtratit të Sulës.
Burime të Policisë së Lezhës dhe të burgut të Shënkollit kanë bërë të ditur se gardianët e burgut kishin vënë re se prej së paku një muaji, Sula kishte shfaqur çrregullime të sjelljes së tij. Hetuesit e Prokurorisë së Lezhës kanë marrë dëshmitë e disa prej gardianëve që kanë qenë më afër vendit të ngjarjes.
Gjithsesi tashmë Prokuroria e Lezhës po heton të gjitha rrethanat e ngjarjes për të dhënë konkluzionin përfundimtar. Ditën e djeshme, situata në burgun e Shënkollit ishte e qetë. Të lënduarit e kanë lënë spitalin, 5 të burgosurit janë rikthyer në qeli, ndërsa u larguan edhe dy oficerët e policisë, gjithashtu të asfiksuar nga zjarri./ Panorama.al
