Më shumë se 330 mijë banorë janë detyruar të largohen nga banesat në Kaliforni, për shkak të 6 zjarreve të fuqishëm që kanë shkrumbuar pjesën Jugore.
Autoritetet raportojnë se zjarret kanë shkaktuar viktimën e parë, pasi trupi i një gruaje u gjet në një zonë të djegur në Ventura County.
“Po përjetojmë ditë që janë vërtetë tronditëse, megjithëse kjo katastrofë natyrore po nxjerr në pah rezistencën e qytetit tonë”, u shpreh kryebashkiaku i Los Anxhelos, Eric Garcetti.
Më shumë së 5 mijë zjarrfikës janë duke luftuar me flakët por autoritetet deklarojnë se është mjaft e veshtirë menaxhimi i tyre për shkakt të erës së fortë e cila favorizon përhapjen e egër të zjarreve.
Ndërkohë, Zjarri masiv që ka përfshirë Kaliforninë ka shkrumbuar edhe shtëpitë luksoze të pasanikëve amerikanë në lagjen “Bel-Air” të Los Anxheles.
Deri më tani rreth 150 mijë hektarë tokë dhe më shumë se 150 ndërtesa janë shkrumbuar plotësisht në veriperëndim të Los Angelesit. Qindra shkolla janë mbyllur. Burimet mediatike njoftuan se zjarri mund të shënjestrojë edhe Sand Digeon.
Bëhet fjalë për avancimin e radhës të flakëve që kanë përfshirë shtetin amerikan, ku kanë lënë pas shkatërrime masive. Vetëm pak javë më parë, zjarret që shpërthyen në pjesën veriore të Kalifornisë shkaktuan vdekjen e 44 personave dhe rreth 9 mijë ndërtesa u raportuan të shkatërruara./OraNews
