Ministri i Mbrojtjes Niko Peleshi ka dhënë pasditen e sotme detaje se si paraqitet situata në zonat ku ka prani të vatrave të zjarrit.
Nëpërmjet një reagimi në rrjetet sociale, Peleshi shprehet se është bërë e mundur shuarja e zjarrit në bashkinë Dropull, ndërkohë që po vijon aksioni në fshatin Kakodhiq në Delvinë dhe pranë liqeneve të Lurës në Dibër.
Ministri u bëri edhe njëherë apel qytetarëve për kujdes gjatë këtyre ditëve të nxehta, në mënyrë që të mbrohet mjedisi.
Postimi i plotë i Niko Peleshit:
Pas një pune të pandërprerë forcat e emergjencave civile, nën koordinimin e Agjencisë Kombëtare të Mbrojtjes Civile kanë bërë të mundur shuarjen e zjarrit në bashkinë Dropull, ku situata po vazhdon të monitorohet për të shmangur çdo mundësi riaktivizimi. Në fshatin Kakodhiq në bashkinë e Delvinës po vijon aksioni me forcat e bashkisë, efektivët e Forcave të Armatosura, forca shtesë zjarrfikësish nga Berati, por edhe dy avionë PZL nga Greqia, për shuarjen e flakëve. Po ashtu operacioni vazhdon edhe pranë liqeneve të Lurës në Dibër.
Mirënjohje të gjithë efektivëve të angazhuar si dhe autoriteteve greke që po asistojnë me dy avionët tip PZL në shuarjen e flakëve në fshatin Kakodhiq!
Përsërisim thirrjen për kujdes të shtuar gjatë këtyre ditëve me temperatura të larta, në mënyrë që të shmangen ngjarje që dëmtojnë mjedisin dhe pasurinë tonë të përbashkët!
