Një 38-vjeçar vdiq në Athinë pasi u godit nga një shtyllë elektrike e shembur gjatë zjarreve shkatërruese që po godasin veriun e kryeqytetit grek. Lajmi u njoftua nga Ministria Greke e Shëndetësisë, që raporton se ky rast shënon viktimën e parë të kësaj vale zjarresh që ka përfshirë vendin prej ditësh, e favorizuar nga temperaturat përvëluese.
16 persona janë shtruar në spital dje dhe sot për shkak të djegieve të lehta apo problemeve të frymëmarrjes si pasojë e zjarreve të fuqishme të ndezura prej ditësh dhe që tashmë kanë arritur në portat e Athinës.
“Vendi ynë po përballet me një situatë jashtëzakonisht kritike,” tha kryeministri grek Kyriakos Mitsotakis mbrëmë. Zjarri po djeg Greqinë tashmë prej një jave, i favorizuar edhe për shkak të temperaturave ekstreme të regjistruara ditët e fundit. Përveç zonave të pyllëzuara dhe fshatrave në ishullin Euboea rreth 200 km në lindje të Athinës, edhe fshati Afidnes, 30 km nga Athina, u godit nga zjarre të fuqishme, mbrëmjen e djeshme./Opinion.al
