Viktimat e para nga zjarret vdekjeprurëse që përfshiu ishullin Maui javën e kaluar janë identifikuar nga zyrtarët.
Departamenti i policisë së Maui emëroi dy viktimat e para si Robert Dyckman, 74 vjeç dhe Buddy Jantoc, 79 vjeç, të dy nga qyteti i Lahaina.
Sipas mediave të huaja, numri i të vdekurve nga zjarret tani ka arritur në 106 dhe rreth 1300 të zhdukur.
Ka të ngjarë të duhen disa ditë të tjera që autoritetet të arrijnë një shifër të saktë për numrin e të vdekurve, tha Guvernatori i Havait, Josh Green.
“Ne shprehim ngushëllimet tona më të thella për familjet që kanë filluar të marrin njoftime për të dashurit e tyre,” tha kryetari i qarkut Maui, Richard Bissen.
Ai tha se autoritetet kanë identifikuar tre individë të tjerë, të afërmit e të cilëve do të informohen.
Presidenti i SHBA Joe Biden ka thënë se do të udhëtojë në Hawaii “sa më shpejt që të jetë e mundur” mes kritikave për reagimin e qeverisë së tij.
Ai tha se “të gjitha asetet federale në dispozicion” në rajon do të përdoren për përpjekjet e rimëkëmbjes, duke përfshirë ushtrinë amerikane dhe rojet bregdetare.
Zyrtarët në Hawaii kanë thënë se presin që numri i të vdekurve të rritet në ditët në vijim pasi më shumë trupa janë gjetur nga pjesët më të goditura të Maui. Vetëm 25% e zonës së prekur deri më tani janë kërkuar për mbetje njerëzore.
Përafërsisht 80% e Lahaina, një qytet me rreth 12,000 banorë, u shkatërrua nga zjarri.
Në terren në Maui, shumë banorë i thanë BBC-së se ishin të frustruar nga shkalla dhe shpejtësia e përpjekjeve të rimëkëmbjes.
Banorët i kanë thënë gjithashtu BBC-së se nuk kishin asnjë paralajmërim zyrtar përpara se të largoheshin nga zjarret, të cilat përpinë me shpejtësi pjesë të ishullit.
Qeveria amerikane tha se kishte dërguar më shumë se 500 personel federal të urgjencës deri më tani për të ndihmuar me përpjekjet e ndihmës.
Janë miratuar gjithashtu hua me interes të ulët për fatkeqësi dhe pagesa një herë prej 700 dollarë për familje.
