Numri i të vdekurve nga zjarret në Hawaii ka shkuar në 36, ndërsa flakët vazhduan të shpërndahen në të gjithë ishullin Maui.
Presidenti amerikan, Joe Biden ka shpallur gjendjen e jashtëzakonshme për katastrofë në Hawaii dhe ka zhbllokuar ndihmën federale për ishujt e shkatërruar nga zjarret. Zyrtarët e Shtëpisë së Bardhë thanë se ai bëri një telefonatë me guvernatorin e Havait, Josh Green të cilit i ka shprehur ngushëllimet e tij të thella për jetët e humbura dhe shkatërrimin e madh të tokës dhe pronës.
“Ne u jemi mirënjohës zjarrfikësve të guximshëm dhe reaguesve të parë që vazhdojnë të vrapojnë drejt rrezikut, duke e vënë veten në rrezik për të shpëtuar jetë”, tha Biden në një deklaratë. “Kam urdhëruar të gjitha asetet federale të disponueshme në ishuj për të ndihmuar.”
Erërat e fuqishme 60 milje në orë nga uragani Dora në Oqeanin Paqësor kanë ndezur flakët që detyruan evakuimin e mijëra banorëve në Maui. Gati 300 shtëpi dhe ndërtesa janë shkatërruar.
Tre vatra zjarresh të veçanta po pwrhapen gjithashtu në të gjithë ishullin e madh ndërsa zjarrfikësit manovrojnë për t’i mbajtur ato nën kontroll.
Dy mijë udhëtarë u bllokuan në Aeroportin Ndërkombëtar Maui për shkak të anulimeve të fluturimeve. Zyrtarët thanë se 4,000 vizitorë dhe banorë të tjerë po strehoheshin në Qendrën e Konventës në Hawaii në Honolulu. Autoritetet u bëjnë thirrje turistëve dhe banorëve që të qëndrojnë larg zonave të prekura.
Rojet bregdetare amerikane kanë shpëtuar tashmë të paktën 14 persona që u hodhën në ujë duke u përpjekur t’i shpëtonin zjarreve. Ata po vazhdojnë të kryejnë përpjekjet e kërkim-shpëtimit për të zhdukurit dhe lëshuan kufizime të përkohshme fluturimi në zonat e prekura./Opinion.al
