Divjaka është një nga zonat ku janë regjistruar disa vatra zjarri, për të cilat autoritetet po punojnë për shuarjen e tyre.
Lidhur me situatën në Divjakë, ka reaguar deputeti socialist Erion Braçe i cili shprehet se gjithçka po ndodh është kriminale dhe e qëllimtë.
Një mesazh e kishte për policinë që nuk ishte e pranishme në vendngjarje, por shpreson se po merret me personat që vënë zjarret qëllimisht.
Sipas Braçes, nëse policia nuk po merret me këtë çështje, nuk ka për t’ia falur askujt.
“E kuptoni ç’keni bërë apo jo? Kjo është e pashembullt dhe kriminale. Është e qëllimtë natyrisht. Nuk ka pikë dyshimi që gjithë furtuna me zjarret dje dhe sot në Shqipëri është kriminale. Shumë faleminderit banorëve dhe zjarrfikësve që po merren me këtë punë këtu në krahun e Divjakës që të premten u shua. Por nuk mbaron këtu, nuk mbaron me kaq. Pavarësisht se nuk e shoh fare këtë shefin e policisë e asnjë polic këtu, shpresoj që të jenë duke u marrë me ata që i kanë vënë zjarrin Divjakës. Në rast se se bëjnë as këtë, kemi punë tjetër se këtë situatën që shihni këtu s’kam për t’ja fal kujt”, tha Braçe.
Pas njoftimit të ish-zv.kryeministrit, ka ardhur edhe reagimi i Policisë së Shtetit, e cila bën me dije se janë shoqëruar në Komisariat 5 persona, si autorë të zjarreve të qëllimshme.
