Ndërsa vatra zjarresh vijojnë të jenë aktive në zona të ndryshme të vendit, policia e Fierit ka vënë në pranga 59-vjeçarin Xhemil Vrenozi pasi ka djegur një sipërfaqe me bimësi pranë grykëderdhjes së lumit Seman.
Ndërkohë është proceduar penalisht edhe një grua Jorgjie Mile, e cila i ka vënë zjarrin një zone me bar të thatë, por flakët kanë dalë nga kontrolli duke shkaktuar dëme tek fqinji.
“Në vijim të punës hetimore për zbulimin dhe vënien përpara përgjegjësisë ligjore të autorëve të zjarrvënieve, specialistët për Hetimin e Krimeve në Komisariatin e Policisë Fier, arrestuan në flagrancë shtetasin Xh. V., 59 vjeç, banues në Hoxharë e Vjetër, Fier, pasi duke djegur barëra të thatë, zjarri i ka dalë jashtë kontrollit dhe është djegur një sipërfaqe me bimësi në vendin e quajtur “Grykëderdhja e lumit Seman”. Gjithashtu, po nga këto struktura u procedua penalisht shtetasja J. M., banuese në Grykë, Fier, pasi duke djegur disa barëra të thatë, zjarri i ka dalë jashtë kontrollit dhe për pasojë ka dëmtuar pronën e tjetrit duke i djegur bazën ushqimore të blegtorisë”, njoftoi policia./Opinion.al
