Pasditen e sotme në media u publikua lajmi se në Spitalin Rajonal të Shkodër është regjistruar një vatër zjarri.
Lidhur me ngjarjen ka folur Drejtori teknik në këtë spital, i cili deklaron se nuk ka patur asnjë vatër zjarri.
Ai thotë se në dhomën teknike të paneleve diellore, shtresa termoizoluese të cisternave kanë nxjerrë tym. Në lidhje me shërbimin, ai tha se nuk ka asnjë problem dhe se pacientët nuk janë evakuuar.
Pyetje: A mund të na thoni diçka rreth zjarrit të rënë gjatë mbrëmjes së sotme në spitalin e Shkodrës?
Nëndrejtori i spitalit të Shkodrës, Lush Marku: Po ju informoj se nuk ka rënë zjarr në Spitalin Rajonal të Shkodrës. Në dhomën teknike të paneleve diellore, shtresa termoizoluese e cisternave të ujit ka nxjerrë tym dhe vetëm si pasojë e kësaj ka dalë i gjithë ai tym që është parë. Nga kontrolli i deritanishëm, nuk është konstatuar se ka pasur ndonjë defekt teknik apo ndonjë kontakt me rrymën e energjisë elektrike. Të gjitha shërbimet, asnjë shërbim nuk është prekur nga ky tym që ka dalë, janë të gjitha shërbimet në funksion. Janë disa dëme minimale të shtresës termoizoluese të depozitave të ujit sanitar.
Pyetje: Sa i përket ofrimit të shërbimit për pacientët a ka pasur problematikë, a është dashur ndonjë evakuim?
Nëndrejtori i spitalit të Shkodrës, Lush Marku: Nuk ka pasur asnjëlloj problematike në lidhje me shërbimin spitalor, nuk ka qenë i nevojshëm evakuimi. Mund ta shikoni dhe këtu në katin e parë, ngjitur me ambientin kur ka dalë tymi.
Nga ana tjetër, policia ka njoftuar se rreth orës 19:30 në një dhomë në bodrumin e Spitalit të Shkodrës ku janë të instaluara pompat e ujësjellësit ka rënë zjarr. Policia dyshon se zjarri ka ardhur si pasojë e një shkëndije elektrike.
Grupi hetimor nën drejtimin e Prokurorisë po punon për zbardhjen e plotë të shkakut të rënies së zjarrit.
